ЯПЛІЭНЭРЭШЪХЬ
Тхьэм Ыпсэ ЛъапІэрэ Антихристос ыпсэрэ
СилъапІэхэр, «Тхьэм Ыпсэ ЛъапІэ сыгу илъ», ыІоу, хэти зыІорэр шъушІошъ шъумыгъэхъу, ау агухэм арылъыр Тхьэм Ыпсэ ЛъапІэ арымэ жъугъэунэфы, сыда пІомэ пегъымбар нэпцІ Іаджи дунаем къыщылъэгъуагъэх. 23ы цІыф горэм Тхьэм Ыпсэ ЛъапІэ ыгу илъмэ, къэшъозыгъэшІэщтыр мары: Исус Христос дунаем цІыфэу къызэрэкІуагъэр хэтми зыдэрэм ыгу Тхьэм Ыпсэ ЛъапІэ илъ. 3Хэтми Исус Христос дунаем цІыфэу къызэрэкІуагъэр зымыдэрэми ыгу Тхьэм Ыпсэ ЛъапІэ илъэп. А цІыфым ыгу илъыр Антихристос ыпсэ ары. Ар къызэрэкІощтыр зэхэшъухыгъ. Джы ар дунаем къэкІогъах.
4Шъо, сибынхэм афэдэхэр, Тхьэм шъурибын, пегъымбар нэпцІхэми шъуатекІуагъ, сыда пІомэ псэу шъугухэм арылъыр псэу мы дунаем ицІыфхэм агухэм арылъым нахьи нахь ин. 5А пегъымбар нэпцІхэр мы дунаем ибыных. Арышъ, мы дунаем иІофхэм атегущыІэх, мы дунаем ицІыфхэри ахэмэ ядэІух. 6Ау тэ Тхьэм тырибын. ЦІыфэу Тхьэр зышІэрэр тэ къытэдэІу, ау Тхьэм ибынэу щымытыр тэ къытэдэІурэп. Джары шъыпкъагъэм Ыпсэ зыгу илъыри, гъэпцІэныгъэм ыпсэ зыгу илъыри тэзыгъашІэрэр.
Тхьэр шІулъэгъуныгъэу щыт
7СилъапІэхэр, шІу тызэрэжъугъэлъэгъу, сыда пІомэ шІулъэгъуныгъэр Тхьэм ыдэжь къекІышъ ары. Хэти шІулъэгъуныгъэ зыгу илъыр Тхьэм ибын ыкІи Тхьэр ешІэ. 8ШІулъэгъуныгъэ зыгу имылъым Тхьэр ышІэрэп, сыда пІомэ Тхьэр шІулъэгъуныгъэу щыт. 9Тхьэм шІу тызэрилъэгъурэр мырэущтэу къыгъэнэфагъ: Ежь Ыкъо закъо щыІэныгъэ къытитыным пае, Тхьэм дунаем къыгъэкІуагъ. 10ШІулъэгъуныгъэу зыфасІорэр мыры: ШІулъэгъуныгъэу Тхьэм фытиІэр арэп, ау тэ Тхьэм шІу тилъэгъуи, типсэкІодхэр тфэзыпщыныжьырэ къурмэныпхъэ хъунэу ежь Ыкъо къызэригъэкІуагъэр ары. 11СилъапІэхэр, Тхьэм ащ фэдизэу шІу тызэрилъэгъугъэм пае, тэри
шІу тызэрэлъэгъун фае. 123ыми Тхьэр егъашІэми нэкІэ ылъэгъугъэп, ау шІу тызэрэлъэгъумэ, Тхьэр тыгухэм арылъ зэпыт, ишІулъэгъуныгъи икъугъэу тыгухэм арылъ.
13Тхьэм ыгу тызэрилъ зэпытри, ежьыр тыгухэм зэрарылъ зэпытри тэзыгъашІэрэр Тхьэм ежь Ыпсэ ЛъапІэу тыгухэм къарилъхьагъэр ары. 14Ты лъапІэм дунаем ицІыфхэр мыкІодхэу къыгъэнэжьынхэм пае, ежь Ыкъо къызэригъэкІуагъэр тлъэгъугъэ ыкІи шыхьат тыфэхъу.
15Исус Тхьэм Ыкъоу зэрэщытыр зыдэрэ цІыфым ыгу Тхьэр илъ зэпытыщт, а цІыфри Тхьэм ыгу илъ зэпытыщт.
16Арэущтэу Тхьэм шІулъэгъуныгъэу къытфыриІэр тшІагъэ, а шІулъэгъуныгъэми тыщэгугъы.
Тхьэр шІулъэгъуныгъэу щыт. ШІулъэгъуныгъэр зыгу илъ зэпыт цІыфыр Тхьэм ыгу илъ зэпытыщт, Тхьэри а цІыфым ыгу илъ зэпытыщт. 17Ахърэт мафэм гушхоныгъэ тиІэнэу Тхьэм ишІулъэгъуныгъэ икъугъэу тыгухэм арылъ, сыда пІомэ Христос зэрэщытым фэдэу, тэри мы дунаем тыщыщыт. 18Тхьэм ишІулъэгъуныгъэ зыгу илъыр щынэрэп, шІулъэгъуныгъэу икъугъэми щынагъор хефыжьы. Щынагъор ахърэт мафэм икъин щэчыныгъэм епхыгъ. ШІулъэгъуныгъэ икъугъэр щынэрэ цІыфым ыгу илъэп.
19Тхьэм ыпэ рапшІэу тэ шІу тызэрилъэгъугъэм пае, тэ тыгухэми шІулъэгъуныгъэ арылъ. 203ыгорэм, «Тхьэр шІу сэлъэгъу», еІо пэтми, ыш ыуджэгъумэ, ар пцІыус. Сыда пІомэ ышэу нэкІэ ылъэгъугъэр шІу зымылъэгъурэм нэкІэ ымылъэгъугъэ Тхьэр шІу ылъэгъун ылъэкІыщтэп. 21Тхьэм мы унашъор къытфишІыгъ: Тхьэр шІу зылъэгъурэм ыши шІу ылъэгъун фае.