ЯТЮКІЫРЭ ТФЫНЭРЭШЪХЬ
ПшъэшъипшІымэ яхьылІэгъэ гъэсэныгъэ тхыдэр
–А мафэм Тхьэу уашъом щыІэм и Тетыгъошхо* зыфэдэу щытыщтыр мары. ПшъэшъипшІмэ яостыгъэхэр аштэхи, шъаом пэгъокІынхэу дэкІыгъэх. 2Ахэмэ ащыщэу тфым акъыл ямыІэу щытыгъэх, тфыр Іушхэу щытыгъэх. 3Акъыл зимыІэ пшъашъэхэм яостыгъэхэр заштэхэм, дагъэ зыдаштагъэп. 4Пшъэшъэ Іушхэм яостыгъэмэ ягъусэу, дагъэ зэрыт дагъалъэхэри зыдаштагъэх. 5Шъаор къызэгужъом, пшъэшъэ пстэури шъхьаукъэхи хэчъыягъэх.
6–Ау чэщныкъом дэжь зы макъэ горэ къэІугъ: «Мары шъаор къакІо! ШъукъыпэгъокІ!»
7–Джащыгъум а пшъашъэхэр зэкІэ къэтэджыхи, яостыгъэхэр агъэхьазырыгъэх. 8Акъыл зимыІэ пшъашъэхэр пшъэшъэ Іушхэм ялъэІугъэх: «Шъуидагъэ щыщ къытэшъут, сыда пІомэ, тиостыгъэхэр мэкІуасэх».
9–Ау пшъэшъэ Іушхэм къаІожьыгъ: «Шъори тэри ар тфырикъухэнэп. Дагъэ зыщэрэмэ адэжь шъукІоу къызфэшъущэфымэ нахьышІу».
10–Къащэфынэу ахэр зэкІохэм, шъаор къэкІуагъ, хьазырэу щытыгъэ пшъэшъитфыри игъусэхэу джэгу зыщашІырэ унэм ихьэхи, къэлапчъэри къыфашІыжьыгъ.
11–Ащ нэуж адрэ пшъашъэхэри къэкІожьхи, мырэущтэу аІуагъ: «Титхьаматэу титхьаматэ! Къэлапчъэр къытфэІух!»
12–Ау ащ къыІожьыгъ: «Шъыпкъэр шъосэІо, шъо хэтми шъузщыщыр сшІэрэп».
13–Арышъ, шъумычъыеу шъусакъ,– къыпигъэхъожьыгъ Исус, –сыда пІомэ ЦІыф Лъэпкъым Ыкъо дунаем къызыкІожьыщт мафэри сыхьатри шъушІэрэпышъ ары.
25:1 Тхьэу уашъом щыІэм и Тетыгъошхо – еплъ 3:2.
Талант зыцІэ ахъщэхэм яхьылІэгъэ гъэсэныгъэ тхыдэр
(Лука 19:11-27)
14–Джыри Тхьэу уашъом щыІэм и Тетыгъошхо къызэрэкІощтыр зыфэдэр мары. Зы лІы горэ хымэ хэгъэгу горэм кІонэу зэхъум, иунэІутмэ къяджи, имылъку аІэкІилъхьагъ. 15Зым талантитф* ритыгъ, нэмыкІми талантитІу ритыгъ, етІанэ нэмыкІми зы талант ритыгъ. Хэти лъэкІыныгъэу иІэм фэшъуашэу рити, гъогум техьагъ. 16Талантитф зэритыгъэр занкІэу кІуи, ахэр ыгъэлажьэхи, джыри талантитф къыхьыжьыгъ. 17Джащ фэдэу талантитІу зэритыгъэми джыри талантитІу къыхьыжьыгъ. 18Ау тхьаматэм зы талант зэритыгъэр кІуи, ар чІыгум чІитІи, итхьаматэ иахъщэ ыгъэбылъыгъ.
19–Бэ тешІагъэу а унэІутмэ ятхьаматэ къэкІожьыгъ, иунэІутхэм ахъщэр зэрагъэлэжьагъэмкІи яупчІынэу ыублагъ. 20Талантитф зэритыгъагъэр тхьаматэм бгъодахьи, адрэ талантитфэу къыхьыгъэхэр къыфихьыхи къыІуагъ: «Тхьаматэ, талантитф къысІэкІэплъхьагъ. Мары, ахэмкІэ джыри талантитф къэсхьыжьыгъ».
21–Тхьаматэм ащ риІуагъ: «Дэгъоу пшІагъэ. О сыпщыгугъышъунэу уунэІут дэгъу! Іоф макІэхэмкІэ сызщыгугъышъунэу лІэу узэрэщытыгъэм пае, Іофыбэхэр къыпІэкІэслъхьащтых. КъакІуи, уитхьаматэ игушІуагъо къыхахь!»
22–Джаущтэу талантитІу зэритыгъагъэри тхьаматэм бгъодахьи къыІуагъ: «Тхьаматэ, талантитІу къысІэкІэплъхьагъ. Мары, ахэмкІэ джыри талантитІу къэсхьыжьыгъ».
23–Тхьаматэм ащ риІуагъ: «Дэгъоу пшІагъэ. О сып-щыгугъышъунэу уунэІут дэгъу! Іоф макІэхэмкІэ сызщыгугъышъунэу лІэу узэрэщытыгъэм пае, Іофыбэхэр къыпІэкІэслъхьащтых. КъакІуи, уитхьаматэ игушІуагъо къыхахь!»
24–ЕтІанэ зы талант зэритыгъагъэри тхьаматэм бгъодахьи къыІуагъ: «Тхьаматэ, о узэрэлІы пхъашэр сшІэщтыгъэ, чылапхъэ зыхэмыпхъагъэм лэжьыгъэр къыщыохыжьы, зыхэмысагъэми къыщыоугъоижьы. 25Сыщынэти сыкІуи, уиталант чІыгум чІэзгъэбылъхьагъ. Мары, оуиер осэтыжьы».
25:15 талант – еплъ 18:24.
26–Тхьаматэм ащ риІуагъ: «О уунэІут бзадж ыкІи уунэІут фэмыф! О пшІэщтыгъэ сэ чылапхъэр зыхэсымыпхъагъэм лэжьыгъэ къызэрэщысхыжьырэри, зыхэсымысагъэм къызэрэщысыугъоижьырэри. 27Арэущтэу зыхъукІэ, сэ сиахъщэ банкым ептын фэягъэба? Ащыгъум къызысэгъэзэжьым, сиахъщэ хэхъуагъэу къычІэсхыжьыщтыгъ».
28–«Мы лІым италант Іышъухи, талантипшІ зиІэм ешъут. 29Сыда пІомэ Тхьэм хэт щыщми зиІэм нахьыбэ къыритыщт, къелыжьынэуи бэ иІэщт. Ау Тхьэм зимыІэм иІэ тІэкІури Іихыжьыщт. 30Ау мы унэІутэу пкІэ зимыІэр шІункІыгъэм икуупІэ хэшъудз. Ащ дэжьым куохьауныгъэрэ цэ зэрэгъэшхыныгъэрэ щыхъущтых».
Ар къызеІо ужым, Исус мэкъэшхокІэ къыІуагъ:
–РыдэІонэу тхьакІумэ зиІэм зэхерэх.
ЦІыф Лъэпкъым Ыкъо цІыф лъэпкъхэм хьмкум зэратыришІыхьащтыр
31–ЦІыф Лъэпкъым Ыкъо* щытхушхо иІэу, имэлэІич пстэури игъусэхэу дунаем къызыкІожькІэ, итІысыпІэ лъапІэу щытхъушхо зиІэм тетІысхьащт. 32Лъэпкъ пстэури ежьым ыпашъхьэ къыщызэрэугъоищтых, мэлахъом мэлхэмрэ пчэнхэмрэ зэрэзэхидзыхэрэм фэдэуи, цІыфхэр зэхидзыщтых. 33Мэлхэр иджабгъукІэ пчэнхэр исэмэгубгъукІэ ыгъэуцущтых.
34–Джащыгъум Пачъыхьэм иджабгъумкІэ щытхэм ариІощт: «Сэ Сятэ лъапІэ ынэшІу зыщифагъэхэр, шъукъакІуи, Тхьэм дунаер къызигъэхъугъэм къыщегъэжьагъэу къышъуфигъэхьазырыгъэ тетыгъор шъуиІэхьышІоу шъуубыты. 35Сыда пІомэ мэлакІэ сызэлІэм, сыжъугъэшхагъ; псыфалІэ сызэлІэми, псы сежъугъэшъуагъ; хымэу сызыщэтыми, сыкъежъугъэблэгъагъ, 36зыщыслъэн зысемыІэми, сышъуфэпагъ; сызэсымаджэми шъукъыслъыплъагъ; хьапсым сызычІэсыми, садэжь шъукъэкІуагъ».
37–Джащыгъум шъыпкъагъэ зиІэ цІыфхэм къыраІожьыщт: «Зиусхьан, сыдигъо мэлакІэ улІэу утлъэгъуи узыдгъэшхагъэр, е псыфалІэ улІэу псы узедгъэшъуагъэр?
25:31 ЦІыф Лъэпкъым Ыкъо – еплъ 8:20.
38Сыдигъуа хымэу утлъэгъуи узедгъэблэгъагъэр, е зыщыплъэн уимыІэу узытфэпагъэр? 39Усымаджэу е хьапсым учІэсэу сыдигъуа утлъэгъуи, уадэжь тыкъызыкІуагъэр?»
40–Пачъыхьэм ахэмэ пэгъокІ аритыщт: «Шъыпкъэр шъосэІо. Сэ сшы* анахь цІыкІу дэдэхэм ащыщэу зыгорэм фэшъушІагъэр сэ къысфэшъушІагъэу мэхъу».
41–ЕтІанэ Пачъыхьэм исэмэгубгъукІэ щытхэм ариІощт: «Садэжь шъуІукІ, шъо Тхьэм ынае зыщифагъэхэр. Шэйтанымрэ ащ имэлэІичхэмрэ Тхьэм афигъэхьазырыгъэ мыкІосэжьын машІом шъукІу. 42Сыда пІомэ мэлакІэ сызэлІэм, сыжъугъэшхагъэп; псыфалІэ сызэлІэми, псы сежъугъэшъуагъэп; 43хымэу сызыщэтыми, сыкъежъугъэблэгъагъэп, зыщыслъэн зысемыІэми, сышъуфэпагъэп; сызэсымаджэми, хьапсым сызычІэсми, шъукъыслъыплъагъэп».
44–Джащыгъум ахэми Пачъыхьэм къыраІожьыщт: «Зиусхьан, мэлакІэ улІэу, е псыфалІэ улІэу, е ухымэу, е зыщыплъэн уимыІэу, е усымаджэу, е хьапсым учІэсэу сыдигъо утлъэгъуи, тишІуагъэ отымыгъэкІэу сыдигъуа укъызыдгъэнагъэр?»
45–Джащыгъум Пачъыхьэм пэгъокІ аритыщт: «Шъыпкъэр шъосэІо, мы цІыкІу дэдэмэ ащыщэу зыгорэм фэшъумышІагъэр сэ къысфэшъумышІагъэу мэхъу».
46–Арэущтэу ахэмэ мыухыжьын къин ащэчынэу ІукІыжьыщтых, ау шъыпкъагъэ зиІэ цІыфхэм мыкІодыжьын щыІэныгъэ къалъысынэу ІукІыжьыщтых.