ЯПШІЫКІУЗЭНЭРЭШЪХЬ
Тхьэм елъэІугъэным ехьылІагъ
(Маттэ 6:9-15; 7:7-11)
Зы чІыпІэ горэм Хьисэ Тхьэм щелъэІущтыгъ. Тхьэм зелъэІу ужым, игъогу рыкІохэрэм ащыщэу зыгорэм ежьым къыриІуагъ:
–Зиусхьан, умэхъэкІо Иуан игъогу рыкІохэрэм Тхьэм узэрелъэІун фэе шІыкІэр зэраригъэшІагъэм фэдэу, ори тэ тэгъашІэ.
2–Тхьэм шъуелъэІу зыхъукІэ, мырэущтэу шъуІо,– ариІуагъ Хьисэ.
«О Тятэ лъапІэу уашъом щыІэр!
ПцІэ цІыфхэм агъэлъапІэу орэхъу.
Уи Тетыгъошхо къэрэкІу.
Узыфаер уашъом зэрэщыхъурэм фэдэу,
чІылъэми щэрэхъу.
3Хьалыгъоу тищыкІагъэр мафэ къэси къытэт.
4Тэ типсэкІодхэр къытфэгъэгъух,
сыда пІомэ тэри хэти мыхъун къытэзышІэрэм
фэтэгъэгъу.
Шэйтаным псэкІод тигъэшІэнэу фит умышІы,
ащи тыщыухъум».
5 –Шъо шъуащыщэу зыгорэм ныбджэгъу иІэу тІон,– ариІуагъ Хьисэ. –Чэщныкъом а ныбджэгъум иунэ макІошъ, реІо: «Синыбджэгъу, чІыфэу хьалыгъуищ къысэт, 6сыда пІомэ синыбджэгъу горэ гъогурыкІоу къысфэкІуагъ. Езгъэшхын зи сиІэп».
7– Арэущтэу зеІом, унэм ис ныбджэгъум адрэм къыреІожьы: «Сымыгъэулэу. Къэлапчъэр гъэпытагъэ, сисабыйхэри сигъусэхэу пІэм хэлъых. Сыкъэтэджэу зыгорэ остын слъэкІыщтэп».
8–Сэ шъосэІо,– къыпигъэхъожьыгъ Хьисэ, – зэриныбджэгъум пае, къэтэджэу хьалыгъур къыримытыщтми, ыуж зэримыкІыжьырэм пае къэтэджынышъ, зыфаер зэкІэ къыритыщт.
9– Арышъ, шъосэІо, шъуелъэІуи Тхьэм къышъуитыщт; шъулъыхъуи къэжъугъотыщт; къэлапчъэми шъутеуи, Тхьэм къышъуфыІуихыщт; 10сыда пІомэ хэтми лъаІорэм зыкІэлъэІурэр иІэ хъущт, лъыхъурэми зылъыхъурэр къыгъотыщт; къэлапчъэм теорэми Тхьэм къыфыІуихыщт.
11Ты къышъухэта, зыкъо хьалыгъу пае къелъэІумэ, мыжъо езытыщтыр, е пцэжъые пае къелъэІумэ, блэ езытыщтыр, 12е кІэнкІэ пае къелъэІумэ, скорпион* езытыщтыр? 13Арэущтэу шъо шъубзаджэ пэтми, шъуибынхэм шІу зэряшъутыщтыр шъошІэ. Ащ нахьи нахьыбэу Ты лъапІэу уашъом щыІэм ежьым елъэІухэрэм ежь ы Псэ ЛъапІэ къаритыщтба?
Хьисэрэ джынапцІэхэм япащэу Велзевулрэ
(Маттэ 12:22-30; Марк 3:20-27)
14 Хьисэ лІы бзако горэм джынапцІэу ащ ыбзэ зыубытырэр хифыгъ. ДжынапцІэр зыхэкІыжьым, бзакоу щытыгъэ лІыр къэгущыІагъ. ЦІыф купышхохэм агъэшІэгъуагъ. 15 Ау ащыщхэу заулэмэ къаIуагъ:
–Велзевулэу джынапцІэхэм япащэ илъэкІыныгъэ ары джынапцІэхэр цІыфхэм зэрахифырэр.
11:12 скорпион – акърэб ары.
16НэмыкІхэми Хьисэ агъэунэфыным пае, зы нэшэнэ гъэшІэгъонышхо горэ уашъом къафыригъэхынэу фэягъэх.
17 Ау ахэмэ ягухэлъхэр Хьисэ ышІэхэзэ ариІуагъ:
– Сыдрэ зы пачъыхьагъуи лъэныкъуитІоу зигощымэ, зэхэтэкъощт, унэ гори лъэныкъуитІоу гощыгъэ хъумэ, къызэхэощт. 18Шэйтанри лъэныкъуитІоу зэрэгъэхъумэ, итетыгъо сыдэущтэу щыІэжьын ылъэкІына? Ар зыкІасІорэр Велзевул илъэкІыныгъэкІэ сэ джынапцІэхэр цІыфхэм ахэсэфыхэу шъоІошъ ары. 19Адэ, Велзевул илъэкІыныгъэкІэ сэ джынапцІэхэр цІыфхэм ахэсэфыхэмэ, шъо шъуицІыфхэм джынапцІэхэр зэрахафырэр хэт илъэкІыныгъэу хъура? Арышъ, ахэр шъо хьыкумышІэхэу къышъуфэхъущтых. 20Ау сэ джынапцІэхэр цІыфхэм зэрахэсфырэр Тхьэм ыІэхъуамбэшъ, Тхьэм и Тетыгъошхо къызэрэшъухэхьагъэр ары ащ къикІырэр.
21 –КІуачІэ зиІэ лІы горэм ІашэкІэ дэгъоу тегъэпсыхьагъэу, иунэ къыухъумэ зыхъукІэ, имылъкукІэ щынагъо щыІэп. 22Ау ащ нахьи нахь кІочІэшхо зиІэ лІы горэ ащ къытебанэу къызытекІокІэ, Іашэу зыщыгугъыхэрэр къытырихынхэшъ, ахэр зэкІэ ыгощыжьыщтых.
23–Сэ симыгъусэр къыспэуцу, сэ къыздэзымыугъоирэми ретэкъухьэ.
ДжынэпцІэ Іаем къызэригъэзэжьырэр
(Маттэ 12:43-45)
24– Зы джынэпцІэ Іае горэ цІыф горэм зыхэкІыкІэ, псы зэрымыт шъоф нэкІым макІошъ, зыгъэпсэфыпІэ горэм лъыхъоу къекІухьэ. ЗыгъэпсэфыпІэ ымыгъотэу, «Сызыхэсыгъэ лІэу сэ сиунэу щытыгъэм ыдэжь згъэзэжьыщт», еІо. 25Ащ ыдэжь къегъэзэжьышъ, унэр пхъэнкІыгъэу, зэлъыІухыгъэу къегъотыжьы. 26Джащыгъум макІо, джынэпцІибл ежьым нахьи нахь бзаджэхэу къыздещэхэшъ, унэм ехьэхэшъ етІысхьэх. ЫкІэм ыкІэжьым а лІым иІоф ыпэм нахьи нахь дэи мэхъу.
27 А гущыІэхэр Хьисэ къыІохэзэ, цІыф купышхом хэтэу зы бзылъфыгъэ горэм ымакъэ Іэтыгъэу къыриІуагъ:
– Ныбэу узэрылъыгъэри, бгъэу узкІэшъугъэри сыхьатмафэ ежьагъэх.
28–Шъыпкъэ,– къыІуагъ Хьисэ, – ау Тхьэм игущыІэхэр зэхэзыхэу, ахэри зыгъэцакІэрэр ащ нахьи нахь сыхьатмафэ ежьагъэх.
ЦІыф Лъэпкъым ы Къо цІыфхэм нэшанэ зэрафэхъурэр
(Маттэ 12:38-42; Марк 8:12)
29ЦІыфхэр нахь купышхохэу Хьисэ ыдэжь къыщызэрэугъоихэ зэхъум, ащ къыІуагъ:
– Джырэ цІыфхэр бзаджэх. Ахэр нэшэнэ гъэшІэгъонышхо фаех, ау пегъымбар Юныс* инэшанэ нэмыкІ Тхьэм ахэмэ къаритыщтэп, 30сыда пІомэ Юныс Ниневие къалэм дэсыгъэ цІыфхэм нэшанэ зэрафэхъугъэм фэдэу, ЦІыф Лъэпкъым ы Къо джырэ цІыфхэм нэшанэ афэхъущт. 31 Ау сэ шъосэІо, къыблэ хэгъэгум щыщэу бзылъфыгъэ пачъыхьэр* ахърэт мафэм къэтэджынышъ, джырэ цІыфхэм къядэощт ыкІи къыгъэмысэщтых, сыда пІомэ а бзылъфыгъэ пачъыхьэр пачъыхьэ Сэлмэн* иакъылышIуагъэ едэІунэу чІылъэм ыкъуапэ къикІи къэкІуагъ, ыкІи мары пачъыхьэ Сэлмэн нахьи нахь инэу зыгорэ къышъухэт. 32Ниневие къалэм дэсыгъэ цІыфхэр ахърэт мафэм къэтэджынхэшъ, джырэ цІыфхэм къядэощтых ыкІи къагъэмысэщтых, сыда пІомэ ахэмэ Тхьэм игущыІэхэр Юныс аригъэІухэу зызэхаххэм, япсэкІодшІагъэхэм афыкІэгъожьыгъэх, ыкІи мары Юныс нахьи нахь инэу зыгорэ къышъухэт.
Пкъым иостыгъ
(Маттэ 5:15; 6:22-23)
33– 3ыми остыгъэ хигъанэу, гъэбылъыгъэ къогъу горэм ар къуигъэуцорэп е щэлъэ чІэгъым чІигъэуцорэп, унэм къихьэхэрэм инэфынэ алъэгъуным пае, итетыпІэ лъагэ тырегъэуцо нахь. 34Пкъым иостыгъэ нэр ары. Арышъ, о унэ псаумэ, зэкІэ ппкъы
11:29-30 пегъымбар Юныс – еплъ Пегъымбар Юныс икъэбар зэрыт тхылъым (Иона) З.
11:31 бзылъфыгъэ пачъыхьэр – еплъ Пачъыхьэхэм якъэбархэр зэрыт апэрэ тхылъым (3 Царств) 10:1-10.
11:31 пачъыхьэ Сэлмэн – Сулиман ары.
нэфынэщт. Ау о унэ дэимэ, зэкІэ о ппкъы шІункІыщт. 35Арышъ, о пхэлъ нэфынэр шІункІыгъэ мыхъуным фэсакъ. 36Арэущтэу зэкІэ о ппкъы шІункІыгъэ хэмылъэу нэфынэ хизмэ, зэкІэ о ппкъы нэфынэу хъущт, остыгъэ нэфынэм укъызэригъэнэфырэм фэдэу.
Хьисэ Тэурат егъэджэкІо пащэхэмрэ фарисейхэмрэ ямысагъэ къызэрыхигъэщыгъэр
(Маттэ 23:1-36; Марк 12:38-40; Лука 20:45-47)
37Хьисэ а гущыІэхэр къызеІохэ ужым, фарисей горэм ежьыр ыгъэшхэнэу иунэ ригъэблэгъагъ. Хьисэ ащ иунэ ихьи, Іанэм пэтІысхьагъ. 38Шхэным ыпэкІэ Хьисэ ыІэхэр зэримытхьакІыгъэхэр фарисеим зелъэгъум, ыгъэшІэгъуагъ.
39–Шъо фарисейхэм шъуишъуалъэхэмрэ шъуилагъэхэмрэ акІыбхэр шъогъэкъабзэх,– риІуагъ Зиусхьаным, – ау нэйпсыягъэрэ бзэджагъэрэ нахь зи шъукІоцІылъэп. 40Шъо акъыл зимыІэхэр! Тхьэу кІыбыр къэзыгъэхъугъэм кІоцІыри къыгъэхъугъэба? 41 Ау шъо шъуишъуалъэхэмрэ шъуилагъэхэмрэ акІоцІ илъыр тхьамыкІэхэм яшъогъэшхышъ, шъоркІэ зэкІэ къабзэу хъущт.
42– Ау сыхьатмыгъо шъуежьагъ, шъо фарисейхэр! Хатэм къыдэкІагъэхэм анахь пыутыхэм ащыщэу зы пшІанэр Тхьэм пае шъоты, ау зэфагъэмрэ Тхьэр шІу зэрэшъулъэгъурэмрэ къэшъогъанэх. Ахэр ары жъугъэцэкІэн фаехэр, адрэ Іофхэри къэшъумыгъанэхэу.
43– Сыхьатмыгъо шъуежьагъ, шъо фарисейхэр! Синэгогухэм тхьамэтэ тІысыпІэхэр ащышъуубытынхэри, зэІукІэхэм цІыфхэр шъуІэхэм щяжъугъэбэунхэри шІу шъолъэгъу.
44– Сыхьатмыгъо шъуежьагъ, шъо Тэурат егъэджэкІо пащэхэри, фарисейхэри, шъо нэпитІу зиІэхэр, сыда пІомэ хэкІодэжьыгъэ къэхэмэ шъо шъуафэд. ЦІыфхэм гу лъамытэу, ахэмэ акІыІу рэкІох.
45Тэурат егъэджэкІо пащэхэм ащыщэу зыгорэм Хьисэ къыриІуагъ:
– Дин гъэсакІу, арэущтэу пІомэ, тэри укъытэхъоны.
46 – Шъо Тэурат егъэджэкІо пащэхэри, сыхьатмыгъо шъуежьагъ,– къыІожьыгъ Хьисэ, – сыда пІомэ хьылъэ зехьэгъуаехэр цІыфхэм атешъолъхьэх, ау ахэмэ шъуадэІэпыІэнэу зы Іэхъуамби жъугъэхъыерэп.
47– Сыхьатмыгъо шъуежьагъ! Пегъымбархэу шъо шъуятэжъхэм аукІыгъагъэхэм апае къэунэхэр шъогъэуцухэшъ, 48 шъуятэжъхэм ашІэгъагъэхэм шъори зэрадежъугъаштэрэр къэшъоушыхьаты; сыда пІомэ шъуятэжъхэр арыба пегъымбархэр зыукІыгъагъэхэр, шъорыба къэунэхэр афэзыгъэуцухэрэр? 49Ащ пае Тхьэм иакъылышIуагъэкIэ къыІуагъ: «Пегъымбархэри апостолхэри ахэмэ афэзгъэкІощтых. Ахэмэ ащыщэу зы купыр къаукІыщт, зы купыми къин рагъэщэчыщт». 50, 51 Арышъ шъосэІо, пегъымбар Авел ылъ щегъэжьагъэу пегъымбар Зэчрей ылъ къыхиубытэу, зэкІэ пегъымбархэм ялъыуасэ джырэ цІыфхэм Тхьэм аригъэпщыныжьыщт. Пегъымбар Зэчрей ары къурмэн шІыпІэмрэ Тхьэм иунэшхорэ азыфагу щагъэкІодыгъагъэр. Шъыпкъэр шъосэІо, ахэмэ зэкІэ ялъыуасэ джырэ цІыфхэм Тхьэм аригъэпщыныжьыщт.
52–Сыхьатмыгъо шъуежьагъ, Тэурат егъэджэкІо пащэхэр, сыда пІомэ шІэныгъэм иІункІыбзэ шъо шъуштагъэ. Ау шІэныгъэм иунэ шъо шъуихьагъэп, ихьанхэу фэягъэхэри ихьанхэу фит шъушІыгъэхэп.
53, 54 Ащ дэжьым Хьисэ зыІокІыжьым, Тэурат егъэджэкІо пащэхэмрэ фарисейхэмрэ ежьыр хагъэукъоным фаехэу, Іоф горэм хаубытэным ешакІохэу, ІофыбэхэмкІэ еупчІыхэзэ рагъэзэу аублагъ.