ЯХЭНЭРЭШЪХЬ
ПсэкІодым иІоф къытхэмылъыжьэу, Христос тыгухэм зэрарылъым пае, тэпсэу
Сыд тІона етІанэ? Тхьэм ынэшІу щыфэныгъэ нахь къыднигъэсыным пае, псэкІод тшІэ зэпытына? 2Хьау, ар хъухэщтэп. ПсэкІодым иІоф къытхэмылъыжьэу, псэкІодым ыдэжькІэ цІыф лІагъэхэм тафэд. Ащыгъум псэкІод тшІэ зэпытэу тыпсэушъуна? 3Христос Исус тыгухэм арылъынэу тэ зэкІэ тызаумэхъым, Христос илІэныгъэ тиІахьэ хэлъынэу тызэраумэхъыгъэр шъошІэба? 4Тызаумэхъым, Христос тыригъусэу тылІи, ежь тыригъусэу тычІалъхьажьыгъэм фэд, Ты лъапІэм илъэкІыныгъэу щытхъушхо зиІэмкІэ Христос лІагъэхэм къызэрахэтэджыкІыжьыгъэм фэдэу, тэри щыІэныгъакІэ тиІэу тыпсэуным пае.
5Христос гъусэ тыфэхъуи, ар зэрэлІагъэм фэдэу тэри тызэрэлІагъэм пае, ар лІагъэхэм къызэрахэтэджыкІыжьыгъэм фэдэу, тэри тыригъусэу лІагъэхэм тыкъахэтэджыкІыжьыщт. 6Сыда пІомэ тишэныжъ бзаджэ Христос игъусэу къащым зэрэтыраІулІагъэр тэшІэ, тыгухэм арылъ псэкІодым илъэкІыныгъэ кІодыным пае. Ащ пае тэ псэкІодым тырипщылІыжьыщтэп. 7Сыда пІомэ цІыфэу лІагъэр псэкІодым ыІэмычІэ чІэкІыжьыгъ.
8Христос тыригъусэу тызэрэлІагъэм пае, ежьым тыригъусэу тызэрэщыІэщтри тшІошъ мэхъу. 9Тхьэм лІагъэхэм къахигъэтэджыкІыжьыгъэу, Христос зэрэмылІэжьыщтыр тэшІэ. ЛІэныгъэм тетыгъо къыфыриІэжьэп. 10Христос зэлІэм, джыри зэ мылІэжьынэу, псэкІодым ыдэжькІэ лІагъэ. Джы щыІэныгъэ иІэу Тхьэм фэпсэу.
11Арэущтэу Христос Исусэу ти Зиусхьан шъугухэм зэрарылъым пае, шъори псэкІодым иІоф къышъухэмылъыжьэу, псэкІодым ыдэжькІэ цІыф лІагъэхэм шъуафэдэу, Тхьэм шъуфэпсэоу зышъулъытэжь. 12Арышъ, псэкІодым шъупкъыхэу лІэщтхэми тетыгъо афыриІэу орэмыхъу, шъуихъопсэныгъэ мыхъунхэм шъуафэмыІорышІэнэу. 13Шъупкъы щыщхэм псэкІод ашІэнэу бзэджагъэм иІашэхэм афэдэхэу шъумыгъэхъух, лІагъэхэм къахэтэджыкІыжьыгъэ цІыфхэми шъуафэдэу Тхьэм зешъут. Шъу-
пкъы щыщхэри шъыпкъагъэм иІашэхэм афэдэхэу Тхьэм фэжъугъазэх. 14ПсэкІодым тетыгъо къышъуфыриІэщтэп, сыда пІомэ хэбзэ унашъохэм аІэчІэгъ шъучІэтэп, Тхьэм ынэшІу щыфэныгъэм ыІэчІэгъ шъучІэт нахь.
Шъыпкъагъэр дгъэцэкІэнэу типшъэрылъ
15Сыд етІанэ? Хабзэм иунашъохэм аІэчІэгъ тычІэмытэу, Тхьэм ынэшІу щыфэныгъэм ыІэчІэгъ тызэрэчІэтырэм пае, псэкІод тшІэнэу тыфита? Хьау, ар хъухэщтэп. 16Шъо шъошІэба, зыгорэм ипщылІхэм афэдэу шъуедэІунэу зешъутымэ, шъузэдэІурэ цІыфым шъыпкъэу шъурипщылІэу зэрэхъурэр? ПсэкІодым шъурипщылІмэ, лІэныгъэм игъогу шъутет, ау Тхьэм шъуедэІумэ, ежьым ыдэжькІэ шъыпкъагъэ шъуиІэу шъуилъытэщт. 17Ау Тхьэм щытхъу фэтэшІы, сыда пІомэ псэкІодым шъурипщылІыщтыгъ, ау тишІошъхъуныгъэ тигъашІэрэ Іофхэу зызэшъутыгъэхэм джы шъугу етыгъэу шъуядэІу. 18Тхьэм псэкІодым илъэкІыныгъэ шъукъыІэкІихыжьи, шъхьафит шъуишІыжьыгъ, шъыпкъагъэми пщылІ шъуфэхъужьыгъ.
19ШъуигурыІоныгъэ зэримыкъугъэм пае, цІыфхэр къызэрэгущыІэхэрэм фэдэу, къыжъугурызгъэІонэу мыр къэсэІо. Шъупкъы щыщхэм бзэджагъэ яжъугъэшІэнэу шІоигъэмрэ бзэджагъэмрэ пщылІхэу зяшъутэу зэрэщытыгъэм фэдэу, джы гукъэбзагъэм игъогу шъурыкІонэу шъупкъы щыщхэр шъыпкъагъэм фэпщылІынхэу фэжъугъазэх. 20Сыда пІомэ псэкІодым шъурипщылІэу шъузыщэтым, шъыпкъагъэр шъозыгъэгъэцэкІэн зи щыІагъэп. 21Ащ дэжьым сыда шъуишІуагъэу къэкІуагъэр? ШъуишІуагъэ зи къэкІуагъэп. Ащ фэдэ Іофхэу джы шъузтеукІытыхьажьхэрэм къахэкІырэр лІэныгъэр ары. 22Ау джы Тхьэм псэкІодым илъэкІыныгъэ шъукъыІэкІихыжьи, шъхьафит шъуишІыжьыгъ, Тхьэми пщылІ шъуфэхъугъ. Ащ шІугъэу къыхэкІырэр гукъэбзагъэм игъогу шъузэрэрыкІорэр ары, ІэхьышІоу къышъулъысыщтри мыкІодыжьын щыІэныгъэ ары. 23Сыда пІомэ псэкІодым къыхэкІырэр лІэныгъэр ары. Ау Исус Христосэу ти Зиусхьан тыгухэм зэрарылъым пае, Тхьэм тынышхоу къытитырэр мыкІодыжьын щыІэныгъэр ары.