ЯПЛІЭНЭРЭШЪХЬ
Христос иапостолхэр
Арэущтэу Христос фэлажьэрэ цІыфхэуи, Тхьэм ишъэфхэр зыІэ къырилъхьэгъэ цІыфхэуи талъытэн фае. 2ЦІыфэу Іоф горэ зыІэ иплъхьэрэр узщыгугъышъун цІыфэу щытын фае. 3Шъори, нэмыкІ цІыфхэри шъукъызэрэсэплъырэм сэркІэ зи хэлъэп. Сэри хьыкум зытесшІыхьэжьрэп. 4Сэ сыгукІэ мыхъун горэ зыдэсшІэжьрэп, ау ащкІэ зи симылажьэу сыхъугъэп. СиІоф хьыкум тезышІыхьэрэр Зиусхьаныр ары. 5Арышъ, игъо къэмысы рапшІэу, Зиусхьаныри къэмыкІоу, Іоф горэм хьыкум тешъумышІыхь. Зиусхьаным Іофхэу шІункІыгъэм хэгъэбылъхьагъэхэр къыгъэнэфэщтых, цІыфхэм агухэм арылъхэри нафэ къышІыщтых. Ащыгъум Тхьэм хэти щытхъоу фэшъуашэр къыритыжьыщт.
6Сшыхэр, шъуишІуагъэ къэкІоным пае, сІуагъэхэр сэ сшъхьэрэ Аполлосрэ* сакъыттегущыІэу сІуагъэх, Тхьэм игущыІэ тхыгъэхэм шъуатемыкІынэу шъодгъэшІэным пае. Ащыгъум зы цІыфым нэмыплъ рихэу, нэмыкІ цІыфым рыпагэу шъуащыщэу зи къэнэжьыщтэп. 7Адрэ цІыфхэм анахьи унахь инэу хэт узылъытэрэр? Тхьэм къыуимытыгъэу сыда уиІэр? УиІэр къыозытыгъэр Тхьэр арышъ, сыд пае узщытхъужьра, Тхьэм ар къыуимытыгъэм фэдэу?
8ЗыжъугъэшхэкІыгъаха? Бай шъухъугъаха? Тэ тышъуимыгъусэу пачъыхьэ шъухъугъа? ШъыпкъэмкІэ па-
3:20 Тхьэм игущыІэ тхыгъэхэм арыт – еплъ Сэбур (Псалтыр) 94:11 (урыс библиемкІэ 93:11).
3:22 Кифэ – еплъ 1:12.
4:6 Аполлос – еплъ 1:12.
чъыхьэ шъухъугъагъоит, ащыгъум тэри тышъуигъусэу пачъыхьэ тыхъущтыгъ. 9Тэ апостолхэм* тиІоф сызэреплъырэр мыры: укІ зытыралъхьэгъэ цІыфхэм тафэдэу аужьырэ дэдэ чІыпІэм тэ, апостолхэр, Тхьэм тыщигъэуцугъэм фэд. Дунае пстэури, мэлэІичхэри, цІыфхэри, ІэягъэкІэ къытэплъынхэу зэкІэмэ апашъхьэ тырагъэуцуагъэм фэд. 10Христос игъогу тызэрэрыкІорэм пае, зэхэшІыкІыныгъэ зимыІэ цІыфхэм тафэдэу тыщыт, ау шъо Христос зыгу илъ цІыф Іушхэу зышъолъытэжьы. Тэ лъэкІыныгъэ тимыІэу тыщыт, ау шъо лъэкІыныгъэ шъуиІ. ЦІыфхэм лъытэныгъи къышъуфашІы, ау тэ нэмыплъ къытахы. 11Мы сыхьат дэдэм нэсыфэ, мэлакІи псыфалІи тэлІэ. Зыщытлъэн тиІэп, цІыфхэми лые къытахы, уни тиІэп. 12Тэ тІэхэмкІэ тылажьэзэ, тэулэу. ЦІыфхэр къызытэхъонхэкІэ, «Тхьэм ынэшІу къышъущерэф», ятэІожьы. ЦІыфхэм къин зытагъэщэчкІэ, тэщыІэ. 13ЦІыфхэр ІэягъэкІэ къызыттегущыІэхэкІэ, дахэкІэ ахэмэ тапэгъокІыжьы. Дунаем ихэкІэу, чІыгум ишІоим фэдэу тыкъэнэжьыгъ.
14ШъузгъэукІытэжьынэу арэп мыр зыфэстхырэр, ау шъо сибын лъапІэхэм шъуафэдэу къыжъугурызгъэІонэу ары. 15Христос игъогу ехьылІагъэу шъуагъэшІэнэу цІыф мин шъуиІэми, ты бэу шъуиІэп. Сыда пІомэ къэбарышІур къызышъосэгъэІум, ты фэдэу сыкъышъуфэхъугъ, Христос Исус шъугухэм арылъ зэрэхъугъэм пае. 16Арышъ, сышъолъэІу, сэ силъэужхэм шъуарыкІу. 17Ащ пае Зиусхьаныр зыгу илъэу, узщыгугъышъунэу щыт Тимофееу* сикІэлэ лъапІэм фэдэу щытыр къышъуфэсэгъакІо. Чылыс зэІукІэ пстэуми зэрязгъашІэрэм тетэу, Христос игъогу сытетэу сызэрэзекІорэ шІыкІэр Тимофей шъугу къыгъэкІыжьыщт.
18Шъуадэжь сыкъэмыкІонэу гугъэхэу, шъуащыщэу заулэмэ зашІошІыжьы. 19Ау Зиусхьаным ыІомэ, бэ темышІэу шъуадэжь сыкъэкІощт. Ащыгъум а зызышІошІыжьхэрэм ягущыІэхэм ямызакъоу ялъэкІыныгъи згъэунэфыщт, 20сыда пІомэ Тхьэм и Тетыгъошхо иІоф зыдэщыІэр гущыІэныр арэп, Тхьэм илъэкІыныгъэ ары нахь. 21Сыда шъузыфаер? Бэщ сІыгъэу шъуадэжь сыкъэкІонэу ара, хьауми шІулъэгъуныгъэрэ гушъэбагъэрэкІэ сыкъэкІонэу ара?
4:9 апостолхэр – еплъ 1:1.
4:17 Тимофей – Паул дэлажьэу, игъогогъухэм ащыщыгъ. Еплъ Апостол. 19:22; Фил. 2:19-22.