АПОСТОЛ ПАУЛ ШІОШЪХЪУНЫГЪЭ
ЗИІЭХЭУ ГАЛАТИЕ ХЭКУМ ИСХЭМ
ТХЫЛЪЭУ АФИТХЫГЪЭР
АПЭРЭШЪХЬ
ШІуфэс ехыныр
Сэ сыапостол* Паул. Апостол сыхъунэу сыкъыхэзыхыгъэхэр цІыфхэр арэп, цІыф горэми сыкъигъэкІуагъэп, сыкъыхэзыхыгъэхэр Исус Христосрэ ар лІагъэхэм къахэзыгъэтэджыкІыжьыгъэ Тхьэу Ты лъапІэмрэ ары. 2Сэррэ сигъусэ сшы пстэумрэ Галатие хэкум* щыІэ чылыс зэІукІэхэм шІуфэс шъотэхыжьы.
3Тхьэу Тятэ лъапІэрэ Зиусхьанэу Исус Христосрэ анэшІу къышъущарэфи, гупсэфыныгъэ къышъуарэт. 4Исус Христос ары джырэ дунаем ибзэджагъэ илъэкІыныгъэ тыІэкІихыжьыным пае, ти Тхьэу ыкІи Тятэ лъапІэ зэрэфэягъэм тетэу, типсэкІодхэр ыпщыныжьынхэм пае, зыпсэ зытыгъэр. 5МыкІодыжьын щытхъушхор ий. Амин.
1:1 апостол – нэмыкІ цІыф горэм ыцІэкІэ гущыІэнэуи Іоф ышІэнэуи фитыныгъэ зиІэр ары.
1:2 Галатие хэкур – Рим (Рум) къэралыгъошхом щыщ хэкоу щытыгъ. А хэкур джырэ Тыркуем итыгъэ къыкъокІыпІэ лъэныкъо итыгъ.
НэмыкІ къэбарышІу зи щыІэп
6Христос ынэшІу щыфэныгъэкІэ Тхьэу зибынхэм ащыщ шъухъунхэу къышъоджагъэм игъогу шъутекІэу, ащ фэдэу псынкІэу нэмыкІ къэбарышІоу зыфаІорэм игъогу шъузэрэтехьагъэр лъэшэу сэгъэшІагъо. 7НэмыкІ къэбарышГу* зи щыІэп. Ау цІыф заулэмэ шъушъхьэхэр зэІагъэхьэ, Христос ехьылІэгъэ къэбарышІури зэблахъунэу фаех. 8КъэбарышІоу тэ шъодгъэІугъэм нэмыкІ къэбарышІоу зыфиІорэр къышъозыгъэІурэм, тэрми уашъом щыщ мэлэІичми, Тхьэм ынае къыщерэф. 9ЫпэкІэ къэтІогъагъэр джыри къэсэІожьы: КъэбарышІоу шъудагъэм нэмыкІ къэбарышІоу зыфиІорэр къышъозыгъэІурэм Тхьэм ынае къыщерэф.
10Джы цІыфхэм сызэрадэным сыпылъа, хьауми Тхьэм сызэридэныр ара сызыпылъыр? Хьауми цІыфхэм агу къызэрэсэІуныр ара сызыпылъыр? Джырэ нэсы цІыфхэм агу къызэрэсэІуным сыпылъыгъэмэ, Христос сыфэлажьэу сыщытыщтыгъэп.
Паул апостолэу зэрэхъугъэр
11Сшыхэр, сэ шъозгъэІугъэ къэбарышІур цІыфым ыдэжь къызэримыкІыгъэр шъушІэнэу сыфай. 12Зы цІыф горэм а къэбарышІур къыІысхыгъэп, зыми ар сигъэшІагъэп, ау ежь Исус Христос а къэбарышІур къысфигъэнэфагъ.
13Джурт диным сыпылъэу сищыІакІэу щытыгъэм икъэбар зэхэшъухыгъэ. Тхьэм ичылыс зэІукІэ къин дэдэ езгъэщэчэу, згъэкІодыным ыуж ситыгъ. 14Слъэпкъ щыщхэу силэгъубэхэм анахьи, джурт диным сызэрэпылъыгъэмкІэ апэ ситыгъ. Тятэжъхэм къытфагъэнэгъэ хабзэхэм сыгу етыгъэу сапылъыгъ. 15,16Ау сянэ ышъо сыхэлъэу Тхьэм сыкъыхихыгъ. ЫнэшІу щыфэныгъэкІи ибынхэм ащыщ сыхъунэу къысэджагъ. ЕтІанэ Ыкъо ехьылІэгъэ къэбарышІур хымэ лъэпкъхэм* язгъэІуным пае, Ыкъо сигъэлъэгъунэу Тхьэм игъоу зелъытэм, зы цІыфи упчІэгъу сшІыгъэп. 17 Сэ сапэ апостол хъугъэ цІыфхэу
1:7 къэбарышІур – еплъ 1 Кор. 9:14. 1:15-16 хымэ лъэпкъхэр – мыджуртхэр ары.
Ерусалим дэсыгъэхэм адэжь сыкІуагъэп, ау Аравие хэгъэгум* сыкІуи, етІанэ Дамаск къалэм згъэзэжьыгъэ.
18Илъэсищ зытешІэм ыуж, тызэрэшІэнэу Кифэ* ыдэжь Ерусалим сыкІуагъ, ащ дэжьи мэфэ пшІыкІутфэ сыщыІагъ. 193иусхьаным ышы Якъубэ* нэмыкІэу, адрэ апостолхэм ащыщэу зи слъэгъугъэп. 20Тхьэ сэІо, къышъуфэстхырэмкІэ пцІы сыусырэп. 21Ащ ыужым Сириерэ Киликиерэ* зыцІэ хэкухэм сащыІагъ. 22Христос ичылыс зэІукІэхэу Иудей хэкум щыІэхэм сынапэ алъэгъугъэу сашІэщтыгъэп. 23Ахэмэ цІыфхэм мырэущтэу зэраІорэр зэхахыщтыгъ ныІэп: «ЛІэу ыпэкІэ къин тэзыгъэщэчыгъэу, тишІошъхъуныгъэ зыгъэкІодынэу тауж итыгъэм а шІошъхъуныгъэм икъэбарышІу джы цІыфхэм арегъэІу». 24Арэущтэу сэщ пае Тхьэм щытхъу фашІыщтыгъ.