ЯТФЭНЭРЭШЪХЬ
Тшыхэр, а Іофхэр къызыхъущт лъэхъанэхэми сыхьатхэми яхьылІагъэу къышъуфэттхынэу ищыкІагъэп. 2ТыгъуакІор чэщым цІыфхэм амышІахэу къызэрэкІорэм фэдэу, Зиусхьаныр дунаем къызыкІожьыщт мафэм дэжь къызэрэкІощтыр шъошІэ. 3«Джы гупсэфыгъо тиІ, щынагъо зи щыІэп», цІыфхэм заІокІэ, етІанэ амышІахэу къинышхо къафэкІощт, шъуз лъэрмыхьэм къинышхо къызэрэфакІорэм фэдэу. Ащ хэкІыжьыпІэ щыІэщтэп.
4Ау шъо, тшыхэр, шІункІыгъэм шъухэтэп. Арышъ, а мафэр тыгъуакІом фэдэу шъумышІахэу къышъуфэкІощтэп. 5Шъо зэкІэри нэфынэм шъурибын, мафэми шъу-
рибын. Тэ чэщыми шІункІыгъэми ябынхэм тащыщэп. 6Арышъ, адрэ цІыфхэр зэрэчъыехэрэм фэдэу, тычъые хъущтэп, ау тымычъыеу тысакъын фае, зыщыІэныгъи тиІэн фае. 7Сыда пІомэ чэщыр ары цІыфхэу чъыехэрэр зычъыехэрэр, чэщыри ары ешъохэрэр зешъохэрэр. 8Ау тэ мафэм ибынхэу тыщытышъ, зыщыІэныгъэ зитэжъугъэгъаІ. ШІошъхъуныгъэмрэ шІулъэгъуныгъэмрэ ашъоджанэм фэдэу зыщытэжъугъалъ, тымыкІодэу Тхьэм тыкъызэригъэнэжьыщтыми тыщыгугъэу, тызэрэпаплъэрэр танджэм фэдэу къэтэжъугъэІэт. 9Сыда пІомэ Тхьэм игубж къыттыригъэфэнэу арэп ибын тыхъунэу тызфигъэнэфагъэр, ти Зиусхьанэу Исус Христос тымыкІодэу тыкъыригъэгъэнэжьынэу ары нахь. 10Тэщ пае Исус лІагъэ, къызыкІожькІэ тыпсэуми, тылІагъэми ежьым тыригъусэу тыпсэуным пае. 11Арышъ, шъузэрэгъэгушху, зым адрэми нахь лъэкІыныгъэ гурэ псэрэкІэ рерэгъэгъот.
Аужырэ Іофхэу Паул шІошъхъуныгъэ зиІэхэу Фессалоникэ дэсхэм агуригъаІохэрэр
12Тшыхэр, къышъуфэлажьэхэу, Зиусхьаным иІофхэмкІэ тетыгъо къышъуфызиІэ цІыфхэу къыжъугурызыгъаІохэрэм лъытэныгъэ афэшъушІынэу тышъолъэІу. 13Ахэмэ Іофэу ашІэрэм пае лъытэныгъэшхо афэшъушІ ыкІи шІу шъулъэгъух. ШъузэгурыІу. 14Тшыхэр, тышъолъэІу, лэжьэнхэу зымыдэхэрэм агурыжъугъаГу, зыгу кІодыгъэхэр жъугъэгушхох, ІэпыІэгъу зищыкІагъэхэми шъуадэІэпыІ, щыІагъэкІэ цІыф пстэуми шъуапэгъокІ. 15Хэти зыгорэм ибзэджагъэ бзэджагъэкІэ пэрэмыгъокІыжь. Ау шъо шІу зэрэзэфэшъушІэщтым шъупылъ, цІыф пстэуми шІу зэрафэшъушІэщтыми ыуж шъуит зэпыт.
16Сыдигъуи шъугушІу. 17Зэпымыоу Тхьэм шъуелъэІу. 18Сыд къышъохъулІэми, Тхьэм щытхъу фэшъушІ, сыда пІомэ шъо Исус Христос зыгу илъхэм арэущтэу шъузэрэзекІорэр ары Тхьэр зыфаер. 19Тхьэм ыПсэ ЛъапІэ имашІо шъумыгъэкІуасэ. 20Тхьэм ежь игущыІэхэр цІыфхэм агухэм къарилъхьэхэу, къызэраригъаІохэрэр пхъэтэпэмыхь шъумышІых. 21Іоф пстэуми яшъыпкъагъэ жъугъэунэфы, дэгъуми шъутет. 22Сыд фэдэ бзэджагъэми зыщышъудзый!
23Гупсэфыныгъэ къытэзытырэ Тхьэм шъугухэр икъукІэ ерэгъэкъэбзэжь, иягъи къышъомыкІэу шъугуи, шъупси, шъупкъи къерэухъум, Зиусхьанэу Исус Христос дунаем къызыкІожьыкІэ, зыми шъузэригъэмысэн зи щымыІэным пае. 24Тхьэу къышъуаджэрэр шъыпкъэ, ащи а Іофыр ыгъэцэкІэщт.
25Тшыхэр, Тхьэм шъукъытфелъэІу. 26Тшы пстэуми гукъэбзагъэкІэ ІаплІ яшъущэкІэу шІуфэс сфяшъухыжь. 27Мы тхылъым шъушы пстэуми шъукъафеджэнэу Зиусхьаным ыцІэкІэ унашъо къышъуфэсэшІы.
28Ти Зиусхьанэу Исус Христос ынэшІу къышъущерэф. Амин.