02

ЯТЮНЭРЭШЪХЬ

ТымыкІодэу Тхьэм тыкъызэригъэнэжьырэм икъэбарышІу

лъапІэ

Арэущтэу зэрэщытым фэшІ Тхьэм игъогу тытемыкІы­ным пае, гущыІэхэу зэхэтхыгъэхэм лъэшэу тынаІэ атед­гъэтын фае. 2Сыда пІомэ гущыІэхэу мэлэІичхэм къагъэ­Іугъэхэм* уащыгугъышъунхэу къычІэкІыгъэх, хэти а гущы­Іэхэм атекІыгъэми, е ямыдэІугъэми Тхьэм ифэшъуашэ къыригъэпщыныжьыгъ. 3Арышъ, тымыкІодэу Тхьэм ты­къызэригъэнэжьырэм икъэбарышІу лъапІэ тимыгъапэмэ, тэри тифэшъуашэ Тхьэм зэрэтигъэпщыныжьыщтым сыдэу­щтэу тыІэкІэкІыщта? Ежь Зиусхьаныр ары ыпэ рапшІэу а къэбарыр къытэзыгъэІугъэр, ащ къыІуагъэхэр зэхэзы­хыгъэхэми а къэбарыр къытфагъэшъыпкъэжьыгъ. 4Тхьэ­ри нэшэнэ гъэшІэгъонышхохэмкІи, Іофышхо гъэшІэгъон­хэмкІи, лъэкІыныгъэ зыхэлъ Іофышхо зэтефыгъэхэмкІи а къэбарышІум шыхьат фэхъугъ. Ащ нэмыкІэу Тхьэр зэ­рэфэягъэм тетэу, ежь Ыпсэ ЛъапІэкІэ Іоф зэфэшъхьаф­хэр ашІэнхэу цІыфхэм лъэкІыныгъэхэр афигощыгъэх.

1:13 Тхьэм . . . риІуагъа – еплъ Сэбур (Псалтыр) 110:1 (урыс библиемкІэ 109:1).

2:2 гущыІэхэу мэлэІичхэм къагъэІугъэхэр – Тэурат хабзэр ары.

Христос ары пащэ къытфэхъоу, тымыкІодэу тыкъэзыгъэнэжьырэр

5КъэкІощт дунаеу джы зигугъу тшІырэр Тхьэм зыІэ къырилъхьагъэхэр мэлэІичхэр арэп. 6Ау Тхьэм игущыІэ тхыгъэхэм арытэу, зы чІыпІэ горэм ыдэжь зыгорэм мырэущтэу къыщиушыхьатыгъ:*

«О Тхьэ, цІыфыр сыда, ащ уегупшысэнэу, цІыф лъэпкъым ыкъо сыда, о ащ укІэлъыплъэнэу? 7ТІэкІурэ* мэлэІичхэм анахьи нахь цІыкІоу бгъэ­хъугъ. ЕтІанэ щытхъушхорэ лъытэныгъэшхорэ фэб­гъэшъошагъэх. 8ЗэкІэри ежьым ылъэгу чІэгъ чІэбгъэуцуагъ». Тхьэм зэкІэри цІыфым ылъэгу чІэгъ зычІегъэуцом, ащ ылъэгу чІэгъ чІэмытэу зи къыгъэнагъэп. Ау джы пстэури цІыфым ылъэгу чІэгъ чІэтэу тлъэгъурэп. 9Ау Исус къин ыщэчэу зэрэлІагъэм пае, Тхьэм ащ щытхъушхорэ лъытэныгъэшхорэ зэрэфигъэшъошагъэ­хэр тэлъэгъу. Сыда пІомэ Тхьэм ынэшІу щыфэныгъэкІэ Исус цІыф пстэуми ачІыпІэкІэ лІэныгъэр ылъэгъуным пае, Тхьэм ар тІэкІурэ мэлэІичхэм анахьи нахь цІы­кІоу ыгъэхъугъ.

10ЦІыфыбэ ибынхэу хъунхэм ыкІи щытхъушхомкІэ Іахьэ къалъысыным пае, Тхьэу зэкІэри къэзыгъэхъугъэу, зэкІэри зыфыщыІэм Исус къинэу ыщэчыгъэмкІэ ифэ­шъошэ тетыгъор иІэу зэригъэхъугъэр къекІоу щытыгъ. Сыда пІомэ цІыфхэр мыкІодхэу къызэригъэнэжьырэ гъогум тезыгъахьэу, пащэ афэхъурэр Исус ары. 11 Сыда пІомэ Исусэу цІыфхэм агухэр зыгъэкъэбзэ­жьырэмрэ цІыфхэу зыгу къабзэ хъухэрэмрэ а зы Ты лъапІэм ибыных. Ащ пае, Исус темыукІытыхьэу ахэмэ ышыхэкІэ яджэ. 12Ащ Тхьэм мырэущтэу риІуагъ:* «Сэ сшыхэм уикъэбар язгъэшІэщт. УицІыфхэм язэІукІи сыхэтэу сэ щытхъушхо о къыпфэсшІыщт».

2:6 Тхьэм игущыІэ тхыгъэхэм арытэу, . . . зыгорэм къыщиушыхьатыгъ – еплъ Сэбур (Псалтыр) 8:4-6 (урыс библиемкІэ 8:5-7).

2:7 тІэкІурэ – Исус мы дунаем зыщыпсэугъэ уахътэр ары.

2:12 Тхьэм мырэущтэу риІуагъ – еплъ Сэбур (Псалтыр) 22:22 (урыс библиемкІэ 21:23).

13Мырэущтэуи къыІуагъ:* «Тхьэм сыщыгугъыщт».

ЕтІани къыІуагъ:

«Мары, сэррэ Тхьэм къыситыгъэ бынхэмрэ».

14А бынхэр лымрэ лъымрэ къахэхъукІыгъэ цІыфых. Арышъ, Исуси лымрэ лъымрэ къахэхъукІыгъэ цІыф хъугъэ, илІэныгъэкІэ шэйтанэу лІэныгъэм тетыгъо фызиІэр ыгъэкІодыным паий, 15лІэныгъэм зэрэщыщына­гъэхэм фэшІ, щыІэхэфэ шэйтаным ипщылІхэу щыІагъэ­хэр шъхьафит ышІынхэм паий. 16Сыда пІомэ Исус зыдэІэпыІэхэрэр мэлэІичхэр арэп, Ибрахьимэ къытехъу­кІыгъэ цІыфхэр* ары нахь. 17Арышъ, Тхьэм фэлажьэрэ дин пэщэшхоу гукІэгъу зиІэу, Тхьэм фэшъыпкъэу хъуным пае, ышхэм* сыд щыщымкІи афэдэу хъун фэягъ, цІыфмэ япсэкІодхэр атырихынхэм пае. І8Шэйтаным Исус псэкІод ригъэшІэнэу зыпэлъым, Исус къин зэрищэ­чыгъэм пае, цІыфхэу шэйтаным псэкІод зэригъэшІэнэу пылъхэм адэІэпыІэн ылъэкІыщт.