ЯТФЭНЭРЭШЪХЬ
Псыхъурэе зыгъэпскІыпІэм дэжь Исус лІы горэ зэрэщигъэхъужьыгъэр
Ащ нэужым джурт мэфэкІ мэфэшхо щыІагъ, Исуси Ерусалим къэкІуагъ. 2Ерусалим Мэл Къэлапчъэ зыцІэм ыдэжь псыхъурэе зыгъэпскІыпІэ горэ, джуртыбзэкІэ Вифездэ ыцІэу, дэт. Шъхьэ зытелъ пкъэу къэлэпчъитф а зыгъэпскІыпІэм иІ. 3А чІыпІэм сымаджэ Іаджи чІэлъыгъэх, нэшъуи, лъащи, зыІэпкъ-лъэпкъ узым зэкІиубытагъи. Ахэр псым зыкъигъэхъыеным ежэщтыгъэх; 4сыда пІомэ Зиусхьаным имэлэІич загъорэ а зыгъэпскІыпІэм хахьэти, псыр къыгъэхъыещтыгъ. Псыр къызыхъыекІэ, апэу ащ хэхьагъэр сыд уз иІэми хъужьыщтыгъ. 5Илъэс щэкІырэ ирэ сымаджэу щытыгъэ лІы горэ а сымаджэхэм ахэлъыгъ. 6Исус ар щылъэу зелъэгъум, бэшІагъэу сымэджагъэу ешІэти, еупчІыгъ:
–Ухъужьынэу уфая?
7–Тхьаматэ,– къыриІожьыгъ сымаджэм, –псыр зыхъыекІэ, зыгъэпскІыпІэм сыхэзыгъэхьан гъусэ сиІэп. Сэ сыкІо къэс, сапэ нэмыкІ горэ псым хахьэ.
8 –Къэтэдж, уипІуаблэ къашти къэкІухь,– риІуагъ Исус.
9Исус ар къызэреІоу, а лІыр хъужьыгъэ. ИпІуаблэ къыштэжьи къыкІухьагъ.
Ар къызыхъугъэр шэмбэт мэфагъ*. 10Арыти, джуртмэ а лІэу хъужьыгъэм раІуагъ:
–Непэ шэмбэт маф, хабзэкІэ уипІуаблэ пштэжьыныр хъущтэп.
11–Сэ сызыгъэхъужьыгъэм «УипІуаблэ къашти къэкІухь», ыІуи къысиІуагъ,– къариІожьыгъ а лІым ахэмэ.
12–«УипІуаблэ къашти къэкІухь», къыозыІуагъэр хэт щыщ?– аІуи еупчІыгъэх.
13 Ау лІэу хъужьыгъэм зыгъэхъужьыгъэр зыщыщыр ышІэщтыгъэп; сыда пІомэ а чІыпІэм цІыф купышхо щыІагъэти, Исус ІукІыжьыгъагъ.
5:9 шэмбэт мафэр – джуртхэм ямэфэ лъапІ ары. А мафэм хэти Іоф ышІэн фитэп.
14 Ащ нэужым Исус а лІым Тхьэм иунэшхо щыІукІи риІуагъ:
–Джы дэгъоу ухъужьыгъ. Нахь Іае къыомыхъулІэным пае, псэкІод умышІэжь.
15А лІыр ІукІыжьи, джуртмэ адэжь кІуи, зыгъэхъужьыгъэр зэрэ-Исусыр ариІотэжьыгъ. 16Шэмбэт мафэм ащ фэдэ Іофхэр зэришІэхэрэм пае, джуртхэм Исус къин къырагъэщэчэу аублагъ, аукІынэуи ыуж къихьагъэх.
17–Джы къызынэсыгъэм сэ Сятэ Іоф ешІэ, сэри Іоф сэшІэ,– ариІуагъ Исус ахэмэ.
18Ащ пае джуртхэм Исус аукІынэу нахьи нахь лъэшэу ыуж итыгъэх. ЬІуж зыкІитыгъэхэр шэмбэт мафэм яхабзэкІэ мыхъущтыр Исус зэришІагъэм имызакъоу, Тхьэм зыфигъадэу, Тхьэр ежь Ятэу зэриІуагъэри ары.
Къо лъапІэм тетыгъоу иІэр
19–Шъыпкъэ дэдэр шъосэІо,– ариІуагъ Исус ахэмэ, –ежь-ежьырэу Къо лъапІэм зи ыгъэцэкІэн ылъэкІыщтэп; Ты лъапІэм ыгъэцакІэу ылъэгъурэм нэмыкІ зи ыгъэцэкІэн ылъэкІыщтэп. Ты лъапІэм сыд ыгъэцакІэми, Ыкъуи ар егъэцакІэ. 20Сыда пІомэ Ты лъапІэм ежь Ыкъо шІу елъэгъу. Ежьым ыгъэцакІэрэ пстэури Ыкъо къырегъэлъэгъу, жъугъэшІэгъоным паий, мы Іофхэм анахьи нахь Іофышхохэр Ыкъо ригъэлъэгъущтых. 21Арэущтэу лІагъэхэр Ты лъапІэм къыгъэтэджыжьхэзэ къызэригъэпсэужьхэрэм фэдэу, Ыкъуи ежь зыфэе цІыфхэр къегъэпсэужьых. 22Ты лъапІэм зыми хьыкум тыришІыхьарэп, ау хьыкум шІын Іоф пстэури Ыкъо къыфигъэзагъ, 23цІыф пстэуми Ты лъапІэм лъытэныгъэ зэрэфашІырэм фэдэу, Ыкъуи лъытэныгъэ фашІыным пае. Ыкъо лъытэныгъэ фэзымышІырэм Ты лъапІэу ар къэзыгъэкІуагъэми лъытэныгъэ фимышІэу мэхъу.
24–Шъыпкъэ дэдэр шъосэІо, сэ сигущыІэхэм ядэІоу, сыкъэзыгъэкІуагъэмкІэ шІошъхъуныгъэ зиІэ хъурэм мыкІодыжьын щыІэныгъэ иІэ хъугъэ. Тхьэм ар ыгъэмысэщтэп, ау ар лІэныгъэм ІэкІэкІыжьи, щыІэныгъэм ІэкІэхьагъ. 25Шъыпкъэ дэдэр шъосэІо, лІагъэмэ Тхьэм Ыкъо ымакъэ зэхахынышъ, ежьым едэІухэрэм щыІэныгъэ зыщагъотыщт мафэр къэкІощт ыкІи къэкІогъах. 26Сыда
пІомэ Ты лъапІэм цІыфхэм щыІэныгъэ зэраритырэм фэдэу, ежь Ыкъуи цІыфхэм щыІэныгъэ аритынэу тетыгъо къыритыгъ. 27Сэ ЦІыф Лъэпкъым Ыкъоу* сызэрэщытым пае, цІыфхэм хьыкум атесшІыхьанэу Ты лъапІэм тетыгъо къыситыгъ.
28–Ар шъумыгъэшІагъо, сыда пІомэ къэхэмэ ачІэлъ пстэуми Тхьэм Ыкъо ымакъэ зэхахынышъ, къэхэм къызщычІэкІыжьыщт мафэр къэкІощт. 29ШІу зышІагъэхэр псэунхэу къэтэджыжьыщтых, е зышІагъэхэми ямысагъэ фэшъуашэу агъотыжьынэу къэтэджыжьыщтых. 30Сэр-сэрэу зи сшІэн слъэкІыщтэп, ау Тхьэм къыІоу зэрэзэхэсхырэм фэдэу, цІыфмэ хьыкум атесэшІыхьэ; хьыкумэу сэ атесшІыхьарэри зафэ, сыда пІомэ сэ сызыфаем ыуж симытэу, сэ сыкъэзыгъэкІуагъэр зыфаер згъэцэкІэным ыуж сит.
Шыхьатхэу Исус фэхъухэрэр
31–Сэр-сэрэу шыхьат сызфэхъужьмэ, сишыхьатныгъэ хъунэу щытэп, 32ау нэмыкІ горэ шыхьат къысфэхъунэу щыІ. Ащ сэ къысэхьылІагъэу къыушыхьатырэр зэрэшъыпкъэр сэшІэ.
33–Шъо лІыкІохэр Иуан фэжъугъэкІуагъэх, ежьыри шъыпкъагъэм шыхьат фэхъугъ. 343ы цІыф горэ шыхьат къысфэхъунэу сищыкІагъэп, ау шъо шъумыкІодэу Тхьэм шъукъигъэнэжьыным пае, ар къэсэІо. 35Иуан остыгъэу къэнэфырэм фэдагъ. Ащ инэфынэ тІэкІурэ шъурыгушІонэу шъуфэягъ.
36–Иуан шыхьатныгъэу къысфишІыгъэм нахьи нахь шыхьэтныгъэшхо сиІ. Сэ згъэцэкІэн фэе Іофхэу Ты лъапІэм спшъэ къырилъхьагъэхэр сэгъэцакІэх. А Іофхэр ары Ты лъапІэм сыкъызэригъэкІуагъэмкІэ шыхьат къысфэхъухэрэр. 37Ты лъапІэу сэ сыкъэзыгъэкІуагъэр ежь ышъхьэкІэ шыхьат къысфэхъугъ. Ащ ымакъэ егъашІэми зэхэшъухыгъэп, ынапи шъулъэгъугъэп. 38Ащ сыкъызэригъэкІуагъэмкІэ шІошъхъуныгъэ зэрэшъуимыІэм пае, ащ игущыІэхэр шъугухэм арылъ зэпытхэп. 39Тхьэм игущыІэ тхыгъэхэм мыкІодыжьын щыІэныгъэ ахэжъугъотэн шъуІоу, лъэшэу шъуахэплъэ. Ахэр ары шыхьат
5:27 ЦІыф Лъэпкъым Ыкъо – еплъ 1:51.
къысфэхъухэрэр. 40Ау щытми, а щыІэныгъэр шъуиІэ хъуным пае, садэжь шъукъэкІонэу шъуфаеп.
41–ЦІыфхэр къысщытхъунхэу ыуж ситэп. 42Ау шъо шъусэшІэ: Тхьэм ишІулъэгъуныгъэ шъо шъугухэм арылъэп. 43Сэ Сятэ ыцІэкІэ сэ сыкъэкІуагъ, ау шъо сыжъудэрэп; ау нэмыкІ горэ ежь ыцІэкІэ къакІомэ, ар жъудэщт. 44Тхьэ закъом ыдэжь къикІырэ щытхъум ыуж шъуимытэу, зыр адрэм шъущытхъоу шъущытмэ, сыдэущтэу шІошъхъуныгъэ шъуиІэ хъуна?
45–Ты лъапІэм ыпашъхьэ шъущызгъэмысэнкІэ шъумыгугъ. Шъо шъузыгъэмысэщтыр пегъымбар Мусэу шъузыщыгугъырэр ары. 46МусэкІэ шІошъхъуныгъэ шъуиІагъэмэ, сэркІи шІошъхъуныгъэ шъуиІэщтыгъ, сыда пІомэ Мусэ зигугъу ышІыгъэр сэры. 47Ащ ытхыгъэхэр шъушІошъ зымыхъукІэ, сэ сІохэрэр сыдэущтэу шъушІошъы хъуных?