25

ЯТЮКІЫРЭ ТФЫНЭРЭШЪХЬ

«Кайсарым сиІоф хьыкум тырерэшІыхь», ыІуи, Паул

Іэшъхьэтет Фест зэрелъэІугъэр

Іэшъхьэтетэу Фест зыцІэр хэкум* къызэкІом, мэфищ тешІагъэу Кесарие къалэм* дэкІи, Ерусалим кІуагъэ. 2Джащыгъум дин пэщэшхохэмрэ джуртхэм ятхьаматэхэмрэ Паул едэонхэм пае, Фест ыдэжь къэкІуагъэх. 3Ахэмэ яхьатыркІэ Фест дзэлІхэм Паул Ерусалим къа­ригъэщэнэу ыуж имыкІхэу елъэІугъэх, сыда пІомэ Паул гъогум рыкІозэ, шъэфэу ар аукІынэу агу хэлъыгъ. 4Ау Фест ариІуагъ:

    –Паул Кесарие хьапсым чІэс. Сэри бэ темышІэу ащ дэжь сыкІощт. 5А лІым бзэджагъэ горэ ышІагъэмэ, шъуитхьаматэхэм ащыщэу зы куп сигъусэу къэрэкІуи къерэдау.

24:24 Друзиллэ – Ирод Агриппэ ЯтІонэрэмрэ Вереникэрэ ащыпхъоу щытыгъ. Еплъ 25:13.

24:27 Порцый Фест – Хьисэ къызэхъу нэужым я 60-62 илъэсхэм къакІоцІ Иудей хэкум и Рим (Рум) Іэшъхьэтетэу щытыгъ.

25:1 хэку – Иудей хэкур ары.

25:1 Кесарие къалэр – еплъ 8:40.

6Фест е мэфий е мэфипшІ нахьыбэ ахэмэ адэжь щы­мыІагъэу, Кесарием ехыгъ. ЯтІонэрэ мафэм хьыкум ышІы­нэу итІысыпІэ тетІысхьи, дзэлІхэм Паул къаригъэщагъ. 7Паул къызэлъагъом, Ерусалим къикІыгъэ джуртхэм къа­уцухьи, бзэджэгъэшхо пчъагъэкІэ агъэмысэу аублагъ, ау къаІуагъэхэр къагъэшъыпкъэжьынхэ алъэкІыгъэп.

8–Джуртхэм я Тэурат хабзэкІи, Тхьэм иунэшхокІи, КайсарымкІи мыхъомышІагъэ зи сшІагъэп,– къыІуагъ Паул зигъэхыижьэу.

9Фест джуртхэм шІугъэ горэ афишІэнэу фэягъэти, Паул къыриІуагъ:

–Мы Іофым хьыкум тесшІыхьаным пае, Ерусалим укІо­нэу уфая?

10–ХьыкумышІэу Кайсарым ихьыкум сиІоф тезышІы­хьан фаем ыпашъхьэ сит,– къыІожьыгъ Паул. –О дэгъоу зэрэпшІэрэм фэдэу сэ джуртхэм зи мыхъун ясшІагъэп. 11Ау укІ зифэшъошэ мыхъун горэ сшІагъэу силажьэмэ, укІым зыщыздзыенэу сыфаеп. Ау къызэрысэдаохэрэм шъыпкъагъэ зи ахэмылъмэ, зыми ахэмэ саІэкІигъэхьан ылъэкІыщтэп. Кайсарым сиІоф хьыкум тырерэшІыхь!*

12 Фест иІэпыІэгъухэм задэгущыІэ ужым, къыІуагъ:

–Кайсарым сиІоф хьыкум тырерэшІыхь, пІуи къызэ­рэпІуагъэм пае, Кайсарым ыдэжь укІощт!

Фест Паул икъэбар пачъыхьэ Агриппэ зэрэриІуагъэр

13Мэфэ заулэ зытешІэ ужым, пачъыхьэ Агриппэрэ* ышыпхъу Вереникэрэ Фест шІуфэс къырахынэу Кеса­рием къэкІуагъэх. 14Ахэр мэфэ заулэрэ щыІагъэхэу, Фест Паул иІоф пачъыхьэм ыпашъхьэ рилъхьи риІуагъ:

–Зы лІы горэ хьапсым чІэсэу Феликс къысфигъэнагъ. 15Сэ Ерусалим сызыщэІэм, дин пэщэшхохэмрэ Джуртхэм

25:11 Кайсарым сиІоф хьыкум тырерэшІыхь – Кайсарым Рим (Рум) цІыфхэм яІоф хьыкум тыришІыхьаным пае, зыфагъэзэжьынэу фи­тыныгъэ яІагъ. А лъэхъанэм Неро Кайсарэу щытыгъ. Ар Хьисэ къы­зэхъу нэужым я 54-58 илъэсхэм къакІоцІ Кайсарэу щытыгъ.

25:13 пачъыхьэ Агриппэ – Ирод Агриппэ ЯтІонэрэр Халхис хэгъэгоу Палестинэ хэгъэгум итемыр лъэныкъо итым ипачъыхьэу щытыгъ. Ежьырэ Вереникэрэ Ирод Агриппэ Апэрэм илъфыгъэхэу щытыгъэх. Еплъ 12:1.

дин пэщэшхохэмрэ Джуртхэм янахьыжъхэмрэ садэжь къакІохи, а лІым едаохэу, мыса­гъэ теслъхьанэу къысэлъэІугъэх.

16–Ау сэ ахэмэ ясІожьыгъ: «Зы лІы горэ къедаохэрэм апашъхьэ къихьэу, зэрагъэмысэрэм ипэгъокІ аритэу, зиухыижьынэу фитыныгъэ къырамытмэ, укІ тыралъхьа­нэу Рим хабзэмкІэ хъущтэп». 17Ахэр садэжь къызэкІохэм, Іофыр сымыгъэгужъоу ятІонэрэ мафэм хьыкум тесшІы­хьанэу ситІысыпІэ сытетІысхьи, а лІыр дзэлІхэм къя­згъэщагъ. 18Къедаохэрэр къэтэджыгъэх. Іоф мыхъомы­шІагъэкІэ агъэмысэщт, сІуи, ау зэрагъэмысэн бзэджэ­шІагъэхэу сызэрэгугъагъэхэм ащыщкІэ агъэмысагъэп. 19Ау ежьхэм ядин ехьылІагъэу Іоф заулэхэмкІэ зэгуры­Іощтыгъэхэп. Хьисэ зыцІэ лІы лІагъэу, Паул псаоу зы­фиІуагъэмкІи зэгурыІощтыгъэхэп. 20Мыщ фэдэ Іофхэм хьыкум зэратесшІыхьащт шІыкІэр сшІагъэпти, а лІым сеупчІыгъ: «Ерусалим укІоу, ащ дэжьым хьыкум къы­щыптесшІыхьанэу уфая?» 21Паул иІоф Кайсарым хьыкум тырешІыхьэфэ, хьапсым чІагъэсынэу къызэлъаІом, ар Кайсарым ыдэжь сэгъэкІофэ, хьапсым чІагъэсынэу уна­шъо сшІыгъэ.

22–Сэ сшъхьэкІэ а лІым къыІохэрэм сядэІунэу сыфай,– ыІуи, Агриппэ Фест къыриІуагъ.

–Неущ уезгъэдэІун,– къыІожьыгъ Фест.

23ЯтІонэрэ мафэм цІыфхэм лъытэныгъэшхо къафа­шІызэ, Агриппэрэ Вереникэрэ цІыфхэм хьыкум зыща­тырашІыхьэрэ унэшхом къихьагъэх. Ахэмэ ягъусэхэу дзэ пэщэшхохэри къалэм итхьаматэхэри къихьагъэх. ЕтІанэ Фест унашъо ышІи, Паул къащагъ.

24–Ори пачъыхьэ Агриппэ, шъори мыщ дэжьым тигъу­сэхэу щыІэ цІыф пстэури, мы лІым шъуеплъ!– къыІуагъ Фест. –Джурт пстэури Ерусалими мыщ дэжьыми садэжь къакІохи, агъэмысэзэ, «А лІыр нахьыбэрэ псэу хъущтэп», аІозэ зыфэкуощтыгъэхэр мы лІыр ары. 25УкІ зифэшъошэ бзэджагъэ зи ымышІагъэу къэзгъотыгъ, ау ежьым «Кай­сарым сиІоф хьыкум тырерэшІыхь», ыІуи лъэІуагъэти, Кайсарым ыдэжь згъэкІонэу тесыубытагъ. 26Ау гъэнэфэ­гъэ къэбар зи ежьым ехьылІагъэу Кайсарым фэстхы­нэу сиІэп. Арыти, шъо пстэуми шъуапашъхьэ къыряз­гъэщагъ, зэкІэми анахьэу оры, пачъыхьэ Агриппэ, тызеупчІы ужым, стхыщтыр сшІэным пае; 27сыда пІомэ зэрыдгъэмысэрэр ятымыгъашІэу, хьапсчІэс горэ афядгъэ­щэныр емыкІоу сэлъытэ.