26

ЯТЮКІЫРЭ ХЫНЭРЭШЪХЬ

Пачъыхьэ Агриппэ ыпашъхьэ Паул зызэрэщиухыижьыгъэр

Ащ нэужым Агриппэ Паул риІуагъ:

–Зыуухыижьэу укъэгущыІэнэу уфит.

Паул ыІэ къыІэти, зиухыижьэу къыІуагъ:

2–Пачъыхьэ Агриппэ, джуртхэм сызэрагъэмысэрэ Іоф пстэумкІи о уапашъхьэ зызэрэщысыухыижьырэр сэ насыпышІуагъэу зыфэсэлъытэжьы. 3Анахьэу, джуртхэм яхабзэхэри зэрызэнэкъокъурэ Іоф пстэури дэгъоу зэрэ­пшІэхэрэм паешъ ары. Арышъ, сэ къасІохэрэм уигуапэу укъядэІункІэ сыолъэІу.

4–СикІэлэгъу къыщегъэжьагъэу, сэ слъэпкъ сыхэтэу Ерусалим сызэрэщыпсэурэр джурт пстэуми дэгъоу ашІэ. 5Ахэмэ сызашІэрэр бэшІагъэ. Диным рылажьэрэ цІыф купхэм ащыщэу анахь пытэу Фарисей* купкІэ заджэ­хэрэм игъогу сырыкІоу зэрэщытыгъэр ахэр фаехэмэ, къаушыхьатын алъэкІыщт. 6Тхьэм тятэжъхэр къызэригъэгугъэгъэхэ Іофым* сызэрэщыгугъырэм пае, джы хьы­кумышІэм ыпашъхьэ сыкъыращагъ. 7Тхьэм тятэжъхэр къызэригъэгугъэгъэ дэдэр ары тэ тлъэпкъ иунэгъо лъэпкъ пшІыкІутІур чэщи мафи агу етыгъэу, Тхьэм фэлажьэхэзэ, къагъотынэу зыщыгугъыхэу зыпаплъэхэ­рэр. О пачъыхь, сэри ащ сызэрэщыгугъырэр ары джурт­хэр къызкІысэдаохэрэр. 8Тхьэм лІагъэхэр къызэригъэтэ­джыжьыщтхэр къэмыхъун Іофэу сыд пае шъулъытэрэ?

9–ЗэрэслъэкІэу Назарет щыщ Хьисэ ыцІэ сыпэуцу­жьын фаеу сэри сшІошъ хъущтыгъэ. 10Ерусалим арэу­щтэу щысшІыщтыгъ. Дин пэщэшхохэм фитыныгъэ къаІысхи, сицІыфхэм Тхьэм ицІыф лъапІэхэм ащыщхэу бэхэр хьапсым чІязгъадзэщтыгъэх. Тетыгъо зиІэхэм ахэмэ укІ хьыкум затыралъхьэм, сэри ар игъоу слъыта­гъэ. 11Синэгогу пстэуми ахэмэ бэрэ къин щязгъэщэчы­щтыгъ, Хьисэ езгъэхъонынхэуи сыпылъыщтыгъ. Лъэшэу сафэгубжэу, къин язгъэщэчынэу хымэ къалэхэми анэсы­фэ сакІэлъыкІощтыгъ.

26:5 Фарисей – еплъ 5:34.

26:6 Тхьэм тятэжъхэр къызэригъэгугъэгъэхэ Іофыр – лІагъэхэр къы­зэрэтэджыжьыщтхэр ары (еплъ 23:6; 24:15).

Паул Зиусхьан Хьисэ игъогу зэрэтехьагъэм икъэбар

къызэриІотэжьыгъэр

(Апостол. 9:1-19; 22:6-16)

12–Арэущтэу дин пэщэшхохэм фитыныгъэ къаІысхы­гъэу, пшъэрылъи къысатыгъэу, Дамаск сыкІонэу щы­тыгъ. 13Шэджагъом дэжь гъогум сырыкІозэ, тыгъэм нахьи нахь лыдырэ нэфынэ горэ уашъом къехэу, си­гъусэхэмрэ сэррэ тыкъиуцухьэу слъэгъугъэ, типачъыхь. 14Тэ зэкІэ чІыгум тытефи, джуртыбзэкІэ зы макъэ горэм мырэущтэу къыІоу зэхэсхыгъ:

–«Шаул, Шаул, сыд пае къин сэ сэбгъэщэчыра? Цур зием ибэщ кІыхьэ папцІэм цур ылъакъокІэ къызэре­шъутырырэм фэдэу ошІымэ, уиягъэ зэогъэкІыжьы».

15–«О ухэта, Зиусхьан?» сІуагъэ.

–«Хьисээу къин зэбгъэщэчырэр сэры», къыІожьыгъ Зиусхьаным. 16«Ау джы къэтэджи, о плъакъомэ къатеу­цожь. Сэ къысфэлажьэрэ лІы ухъунэу, Іофхэу плъэгъугъэхэмрэ озгъэлъэгъущтхэмрэ къэуушыхьатынхэуи узгъэнэфагъ ыкІи зыозгъэлъэгъугъ. 17О плъэпкърэ, хымэхэу узфэзгъэкІощтхэмрэ укъаІэпысхыжьыщт. 18Ахэр шІункІыгъэм къыхэкІынхэшъ, нэфынэм зыкъыфагъэзэ­ным паий, шэйтаным итетыгъо ыІэчІэгъ къычІэкІын­хэшъ, Тхьэм зыкъыфагъэзэным паий, ахэмэ анэхэр къэ­бгъэплъэжьынхэу адэжь усэгъакІо. Арэущтэу сэркІэ шІошъхъуныгъэ зэряІэм пае, япсэкІодхэр афэгъущтых, Тхьэм ицІыфхэу ежьым зыкъезытыгъэхэм ІэхьышІоу къалъысыщтри ахэми къалъысыщт».

Паул джуртхэмрэ хымэ лъэпкъхэмрэ апашъхьэ Хьисэ шыхьат зэрэщыфэхъугъэр

19–Арышъ, пачъыхьэ Агриппэ, уашъом щыщэу зыкъы­сэзыгъэлъэгъугъэм сыпэуцужьыгъэп. 20Апэу Дамаск къа­лэм дэсхэм, етІанэ Ерусалим дэсхэми, Иудей хэкум зэкІэ исхэми, хымэ лъэпкъхэм ащыщхэми язгъэІущтыгъ, япсэ­кІодхэм афыкІэгъожьынхэшъ, Тхьэм игъогу техьанхэу зэрэфаери, япсэкІодхэм зэрафыкІэгъожьыгъэм фэшъо­шэ ІофышІухэр агъэцэкІэнхэ зэрэфаери. 21 Джары джурт­хэм Тхьэм иунэшхо сыщаубыти, саукІынэу зыкІыпылъы­гъэхэр. 22Ау непэ нэсыфэкІэ Тхьэр ІэпыІэгъу къысфэ­хъузэ, цІыкІуми инми апашъхьэ мыщ дэжьым сыщытэу шъыпкъагъэм шыхьат сыфэхъу. Пегъымбархэмрэ пегъым­бар Мусэрэ къэхъун фэе Іофхэу зыфаІуагъэхэм анэмы­кІхэр къасІохэрэп; 23Мэссихь* къин ыщэчын фаеу зэрэщытыгъэри, апэрэу лІагъэхэм къахэтэджыкІыжьы­гъэу, ежь ылъэпкърэ хымэ лъэпкъхэмрэ нэфынэм икъэ­бар къаригъэІунэу зэрэщытыгъэри ары зыфасІохэрэр.

Паул Агриппэ шІошъхъуныгъэ зыригъэІэнэу зэрелъэІугъэр

24Паул арэущтэу зиухыижьы зэхъум, Фест мэкъэшхокІэ къыІуагъ:

–Паул, удел о. УишІэныгъэшхо пшъхьэ зэригъэкІо­кІыгъ.

25–Сэ сшъхьэ зэкІокІыгъэп, лъытэныгъэ зиІэ Фест,–къыІожьыгъ Паул, –сэ къасІохэрэр гущыІэ шъыпкъэх ыкІи гущыІэ губзыгъэх. 26Пачъыхьэм мы Іофхэр ешІэх, ащ ыпашъхьи гушхоныгъэкІэ сыкъыщэгущыІэ. Ащ гу­зылъимытэгъэ Іоф а Іофхэм зэрахэмытым сицыхьэ телъ, сыда пІомэ мы Іофхэр зэкІэ зы къогъу горэм къы щыхъугъэхэп. 27Пачъыхьэ Агриппэ, пегъымбархэм атхы­гъэхэмкІэ шІошъхъуныгъэ уиІа? ШІошъхъуныгъэ зэ­рэуиІэр сэшІэ.

28–Арэущтэу псынкІэу Мэссихь игъогу сытебгъэхьанэу огугъа?– ыІуи, Агриппэ Паул къыриІуагъ.

29–ПсынкІэми мыпсынкІэми о уимызакъоу, ау непэ сэ къасІохэрэр зэхэзыхырэ пстэури сэ сфэдэ хъунхэу Тхьэм селъэІу, ау Іэхъу-лъэхъу атерэмылъ,– къыІожьыгъ Паул.

30Ащ нэужым пачъыхьэр, Іэшъхьэтетыр, Вереникэ, ахэ­мэ ягъусэхэу щысхэр къэтэджыжьхи, унэм икІыжьыгъэх. 31Унэм зекІыжьхэм, зэраІожьыгъ:

–УкІ е хьапс зифэшъошэ Іоф мы лІым зи ышІагъэп.

32ЕтІанэ Агриппэ Фест риІуагъ:

–Мы лІым иІоф Кайсарым хьыкум тыришІыхьанэу мы­лъэІуагъэмэ, шъхьафитэу ттІупщыжьын тлъэкІыщтыгъэ.

26:23 Мэссихь – еплъ 2:30.